سەمای گوڵ لەم نەورۆزەدا بۆ ئازادی بوو

ڕەفێق حسێن پەناهی

نەورۆزی ئەم ساڵی ڕۆژهەڵات جیاواز بوو، هەر چەندە ئەمەش پێشبینی كراو بوو، بە لەبەر چاوگرتنی ئاڵوگۆڕەكانی ناوچەكە و بە تایبەتی ناڕەزایەتیەكان و خرۆشان و هاتنە سەر شەقامەكانی كۆمەڵانی وەزاڵە هاتووی ئێران و شێواندنی گۆمی مەنگی ئەو جەزیرە ئارامەی ڕۆژهەڵات لە لایەك و چەند ڕووداوی ساڵی ڕابردوو لە كوردستان لەوانە: هاتنە سەر شەقامی خەڵك و ناڕەزایەتی دەربڕین لە بەرامبەر كوشتنی كۆڵبەران لە شاری بانە و دواتر بە پیرەوە هاتنی شارەكانی دیكەی كوردستان و شاری سنە بە تایبەتی، پشتیوانی لە پڕۆسەی گشتپری لە كوردستانی باشوور و ئەو كەرنەڤاڵە گەورە و بەرینەی سەرتاسەری كوردستانی ڕۆژهەڵات و بە هاناوەچوونی خەڵكی لێقەوماوی ئەو ناوچانەی پارێزگای كرماشان كە بە هۆی زەوی لەرزەوە خەساریان بەركەوت كە بینیرا چ هەڵمەتێكی نەتەوەیی گەورە لە كوردستان ڕێكخرا، كۆی ئەم ڕووداوانە ئەوەی پێ نیشان دەداین كە نەورۆزی ئەم ساڵ دەكرێ و جیاواز لە ساڵانی پێشوو بێت، نەورۆزی ئەم ساڵ جگە لەوەی كە كەرنەڤاڵی شادی و خوشی و هاتنە دەرەوە و ئاشتەوایی لەگەڵ سرووشت بوو لە هەمانكاتدا نەورۆزێكی بووژانەوە و هەستانەوە بوو لە دژی نیزامی كۆماری ئیسلامی .
ئەوەی كە بە ڕوونی دەبینین لە ڕۆژەكانی نەورۆزدا كۆمەڵانی تێكۆشەری خەڵكی كوردستان بۆ هەرچی بەرز ڕاگرتنی نەورۆز كە وەكوو بۆنەیەكی نەتەوەیی دەناسرێتەوە هەر چی لە دەستی دێ ئەنجامی دەدات و ڕژیمی كۆماری ئیلامییش ناتوانێ پێشی پێی بگرێت. لەو نەورۆزدا كۆماری ئیسلامی لەلایەك هەموو هەوڵی خۆی خستەگەڕ بۆ ئەوەی پێش بە بەڕێوەچوونی نەورۆز بگرێت بە بانگهێشت كردنی چالاكانی ڕۆژهەڵات، هەڕەشەكردن و تەنانەت گرتن و زیندانی كردن، لەلایەكیتریشەوە هەوڵی بە لاڕێدابردنی نەورۆزی بە گرتنی مەراسمی نەورۆزی لەلایەن دەوڵەتەوە هەموو ڕێگاكانی گرتەبەر بۆ ئەوەی نەهێڵێت ئەو نەورۆزە كۆمەڵانی خەڵكی كوردستان سەمای ئازادی بكەن. وەك بینرا سەرەڕای ئەو هەموو ڕێگرێ و ترس و تۆقاندن و ئەمنییەتی كردن و میلیتاریزە كردنی كوردستان، بەڵام نەورۆزی ئەم ساڵ نەورۆزێكی پەیامدەر و بانگەوازێكی ئاشكرا بوو، هاواری ئازادی بوو، بە بەرزكردنەوەی هێما نەوەیەكان و لە هەڵگرتنی گوڵی سوور و جامانە مەل كردن و سروودی شۆڕشگێرانە، ئاگر تێبەردانی تەنافی ئیعدام و هەڵگرتنی وێنەی ڕامین حسێن پەناهی، نەورۆزی ئەم ساڵیان كردە چقڵی چاوی داگیركەران و بانگەوازی حەقخوازانەی نەتەوەیەكی زۆڵم لێكراو و بێ ماف بەڵام بە ئیرادەیان دا بە گوێ دوژمنانی ئازادی و نەیارانی شادی و خوشیدا. ئەمە خاڵێكی زۆر گرنگە دەبێ بكرێ بە جەوهەری خەبات بۆ داهاتوو؛ ئەو فاكتەرە گرنگەیە كە ئەگەر ئێمە بتوانین نەورۆزی خومان وا بەو شێوەیە سەرەڕای هەموو مەترسیەكان بەو شكۆیە بەرز ڕابگرین دەشتوانین ئاڵای یەكسانیخوازانە و نەتەوەییمان بشەكێنینەوە. ئەم نەورۆزە ئیلهامبەخشی خەباتی داهاتوومانە كە بتوانین پێكەوە بەو شێوازە یەكگرتووانە داوای مافەكانمان وەك ئازادی خوێندن بە زمانی دایكی، پێش گرتن بە لە سێدارەدانی ڕۆڵەكانمان و دەیان و سەددان مافی زەوت كراوی گەلەكەمان كە دەیان ساڵە خوێنی بۆ دەدەین و خەباتی بۆ دەكەین، بكەین .
لێرەدایە نەورۆزی ئەم ساڵ ئەو دەرسەی تێیدایە كە چۆن لە ڕۆژێكی ئاوادا دەتوانین بە ئیرادەی خەڵكی خومان بە هێزی خومان لە هەموو ساڵدا لە هەموو دەرفەتەكان و ڕووداوەكاندا ئاوا بە هێز و یەكڕێز و یەكگرتوو حزوور پەیدا بكەین؛ زۆر گرنگە و جێگەی بایەخە ئەو پرسیارانە كە ئەم شێوازە لە خەبات دەتوانێ میكانیزمی خەبات و تێكۆشانی داهاتوومان دیاری بكات و كەڵكی باشی لێ وەربگرین. هاوكاری، هەماهەنگی و ئیرادە، تێكەڵەیەك بوون كە هەڵگری ئەو فەلسەفەیە چۆن لە نەورۆزدا هەموو تاكێكی كۆمەڵگا بە بێ جیاوازی بیر و هزر و ئایدۆلۆژیایەك شان بە شانی یەكتر بەرەو گرتنی نەورۆزێكی ئاوا بەرین و بە شكۆ دەڕوا. ئەم پەیامە یەكرگتووانە، ئەم ئیرادە خوبەخش و ژیرانەیەی كۆمەڵانی خەڵكی كوردستان لە ڕابردوودا پاڵنەرێكی بەهێز بوو كە هێزە سیاسیەكانی ڕۆژهەڵاتیشی لە دەوری یەك كۆكردەوە. نەورۆزی ئەم ساڵ پەیامێكی ئاشكرایە بۆ حیزبە ڕۆژهەڵاتیەكان كە یەكرگتوویی و یەكڕیزی دەتوانێ چ ئاراستەیەكی درووست بە خەبات لە ڕۆژهەڵات بدا، ئەو دەرسەی دا كە خەڵك دەگەڕن بۆ دیتنەوەی خاڵە هاوبەشەكانیان، خاڵی هاوبەش لێرەدا نەورۆزە واتا هەموومان كە دەیگرین با پێكەوە لە بەرامبەر دوژمندا بە یەكگرتوویی و بە هاوكاری و هەماهەنگی بیگرین تاكوو زیاتر لەوەی كە هەیە دوژمن چۆكی بشكێ بۆ ئەوەی زیاتر هیوا لە دڵی خەڵكدا زیندوو بكەینەوە .
خاڵێكی گرینگی ئەم نەورۆزەی ئەم ساڵ ئەوە بوو كە بە پێچەوانەی دوژمن و نەیار، كە هەمیشە بانگەشەی ئەوەیان دەكرد حیزبەكان دوورن لە خەڵك و خەڵك وڵامیان ناداتەوە، نەورۆزی ئەم ساڵ ڕێك ئەو پرۆپاگەندەی بە درۆ خستەوە و سەلماندنی كە حیزبەكان هەر خوشەویستی خەڵكن. هەڵگرتنی گوڵی سوور و جامانە دوو هێمای جوانی نەورۆزی ئەم ساڵ بوو، گوڵی سوور هێمایە بۆ بەرز ڕاگرتنی یادی هەموو گیانبەختكردووانی بزووتنەوەی شۆڕشگێڕانەی كودستان و جامانەش هێمای بەرزڕاگرتن و زیندووڕاگرتنی ڕۆحی شۆڕشگێرانەیە كە بینرا لە سەرتاسەری ئەو كوردستانە لە هەر شوێنێك مەراسمی نەورۆزی بەڕێوە چووبێت كۆمەڵانی خەڵك بە گوڵی سوور و جامانەوە بەشداریی مەراسمەكانیان كردووە. ئەوە لە حاڵێكدا كە ڕژیم لە زۆربەی ناوچەكاندا بە زۆر، گوڵی سووری لە خەڵك وەرگرتووە و نەیهێشتووە هەڵیبگرن، هەر بۆیە خەباتی شارەكان ڕێك هاو ئاراستەیە لەگەڵ خەباتی پێشمەرگانە و حیزبەكان لە دەرەوە، ئەوە خاڵێكی گرینگی ئێستای كوردستانە كە هاوئاهەنگ و هەماهەنگ لە یەك ئاراستەدا هەر دووك خەباتی شار و شاخ تێكەڵ یەك كراون. لێرەدا ناكرێ ئەوە لەبەرچاو نەگرین كاریگەریی حیزبەكان و پشتیوانیی هێزی پێشمەرگەیە دڵ گەرمی دەبەخشێتە ئەو خەڵكە كە ئاوەها هاتوونەتە مەیدان؛ ئەوەیە خاڵی وەرچەرخان لە مێژووی خەباتی كوردستانی ڕۆژهەڵات و هەر ئەمەشە ڕژیمی تۆقاندووە و هەموو هەوڵی خۆی دەدا بۆ سەركوت و لە ناو بردنی تێكۆشەرانی گەلەكەمان. لە دەرەوە بۆ حیزبەكان بۆمب دادەنێ و تێكۆشەرانمان تیرۆر دەكا، لە ناو خۆی وڵاتیش دەیان گرێ و زیندانیان دەكا، بەڵام لێرەدا ئەم نەورۆزە ئەوەی دەرخست كە خەباتی ڕۆژهەڵات ڕێگای و ڕێچكەی خۆی كردووتەوە و هەستاوە سەر پێ و ڕێكەوتووە و هیچ هێزێكی دیكتاتۆر ناتوانێ پێشی پێ بگرێ. ئەم كاروانە لە كوردستان هەر دەگات بە دوامەنزڵی خۆی و لە كوردستانی ڕۆژهەڵاتدا سەمای ئازادیش دەگیرێت. سەمای گوڵ لەم نەورۆزەدا ئەو هیوایەی دایەوە بە هەموومان، ئێوە گوڵ بە دەستەكانی ڕۆژهەڵات سەر كاروانی خەباتی ئێمەن و هەستان و خرۆشانتان و شەكانەوەی گوڵی سوورتان بەهاری ئەم ساڵی كوردستانتان ڕازاندەوە .


ئه‌م بابه‌ته 1919 جار خوێنراوه‌ته‌وه‌‌

PM:05:41:09/04/2018


زۆرترین خوێندراو