ئازادی گەوهەرێكی گران بەهایە

عەبدوڵڵا موهتەدی

ئازادی گەوهەرێكی گران بەهایە، بەڵام نرخێكی سەنگینیشی هەیە، ئەمە ئەو دەرسەیە كە گیانبەختكردووانی گوردانی شوان و هەموو گیانبەختكردووانی ڕیزەكانی كۆمەڵە و هەموو گیانبەختكردووانی شۆڕشی ڕزگاریبەخشی كوردستان بە ئێمەی دەدەن.
هاوڕێیان، ۳۰ساڵ پێش ئێستا، لەوەها ڕۆژێكدا لە كەناری چەمی سیروان كارەساتێكی گەورە خوڵقا؛ دوو ڕۆژ پێش ئەوە بە كیمیابارانی هەڵەبجە لە ڕۆژی ۱٦ی مارسدا ٥۰۰۰ كەس لە خەڵكی بێتاوانی هەڵەبجە بوون بە قوربانیی كیمیابارانی ڕژیمی سەدام و ئەمە خۆی لە درێژەی كارەساتێكی گەورەتری جینۆسایدی كورد بوو بەناوی ئەنفال بەڕێوە دەچوو. هاوڕێیانی گوردانی شوان كە نموونەیەكی خۆڕاگر و قارەمانێتیی پێشمەرگانە بوون، لە لایەكەوە كەوتنەبەر شاڵاوی ئەم هێرشی كیمیاییە و لە لایەكی دیكەشەوە بەرهێرشی ڕژیمی كۆماری ئیسلامی و هێزەكانی، كە بەرەو هەڵەبجە و بەرەو ئەو دەڤەرە هاتبوون. هەموو هەوڵێك درا بۆ ڕزگاركردنیان بەداخەوە سەركەوتوو نەبوو و لە ئەنجامدا ۷۲ كەس لەهاوڕێیانمان لەو كارەساتەدا گیانیان بەختكرد و هەر ئەوەش هۆكارێك بوو بۆ ئەوەی كە ڕۆژی گیانبەختكردووانی كۆمەڵە، ڕۆژی كارەساتەكەی گوردانی شوان بێت. لەو ڕۆژەوە تا ئێستا ڕووداوی زۆر هاتوونەتە پێش، نە ئێمە بێ شەهید بووین و نە دوای ئەوەش كوردستان بێ قوربانی ماوەتەوە. دەستی تاوانكاری ڕژیمە دیكتاتۆرییەكانی ناوچە كە كوردیان تێدا دەژی، لە هەموو شوێنێك درێژتر بووە و ڕۆڵەكانی گەلی كوردی خەڵتانی خوێن كردووە. ئێمە لەم ڕۆژەدا ڕێز لە هەموویان دەگرین، چ ئەوانەی لە كوردستانی ڕۆژهەڵات لە بەرامبەركێ لەگەڵ ڕژیمێكی دیكتاتۆریی تۆتالیتەری تیڕۆریست گیانیان بەختكردووە، چ ئەوانەی لە بەرەكانی شەڕی دژی داعش لە كوردستانی باشوور گیانیان داوە، و چ خەڵكی عەفرین كە ئەمڕۆ لەژێر هێرشێكی بێ بەزەییانەدا گیانیان بەخت دەكەن.
كوردستانی ڕۆژهەڵاتیش  لە ۳۰ ساڵی ڕابردوودا ئاڵوگۆڕی زۆری بەسەردا هاتووە. وەختێك ئەو گیانبەختكردووانە لە مەیدانی خەباتدا هەوڵیان دەدا، هێشتا هیواێكی گەورە لە دڵیان دابوو، بەڵام ئاسۆیەكی ڕوون لە بەردەم كەس نەبوو، ساڵ هاتوو ساڵ ڕۆیی، ئەوانەی كە بڕوایان وابوو ڕژیمە دیكتاتۆرییەكان تاسەرن، ڕووڕەشیان بۆ ماوە و یەك لەدوای یەك دەبینین كە حكوومەتە داگیركار و تیرۆریستەكان جێگەیان پێ لەق و پێ لێژ دەبێ، یەك لەوانە و لە سەرووی هەموویانەوە ڕژیمی كۆماری ئیسلامیی ئێرانە. ساڵی ڕابردوو ئێمە شاهیدی ئەوە بووین كە نزیكەی ۱۰۰ شاری ئێران لە هەستانەوەیەكی گەورەدا ئیرادەی خۆیان بۆ گۆڕانكاریی سیاسی و گۆڕانی سیستمی سیاسی لە ئێران ڕاگەیاند؛ پشتی كۆماری ئیسلامیان شكاند، جێگەیان پێ لەق كرد، ڕەوایی و مەشروعییەتیان لەبەر چاوی دونیا هێنایە ژێر پرسیار و ناكۆكیی ناوخۆی و ئەو ڕژیمەیان گەیاندە ئەوپەڕی خۆی. ئێستا ئێمە ئاسۆیەكی ڕوونتر لەبەر چاومانە، ئێستا هیوایەكی زۆرتر لە دڵی كۆمەڵانی خەڵك دایە بەڵام بە هەموو ئەوانەشەوە ئەو گۆڕانكارییە تەنیا سەرەتایەكە بۆ گۆڕانكاریی گەورەتر. ڕیزی پێشمەرگەی كۆمەڵە پتەوتر لە هەمیشە، سەرەڕای هەموو تەنگوچەڵەمەیەك، سەرەڕای هەموو مەحدودییەتێك، درێژەی بە ژیان و درێژەی بە چالاكیی خۆی داوە و ڕێگەی پڕ لە شانازیی ئەو ڕۆڵە شەهیدانەی درێژە پێداوە.
ڕۆژی ۲۷ی ڕەشەمە كاتێكە كە ئێمە جارێكی دیكە پەیمان نوێ بكەینەوە لەگەڵ ڕێبازی ئەو ئازیزانەی كە چرای ڕوونكەرەوەی ڕێگای ئێمە بوون. ڕۆژێكە كە بەڵێن تازە بكەینەوە كە ڕێگەیان هەر درێژەی هەیە، خەباتیان زیندووە، پەیڕەوان و ڕێڕەوانی ئەو ڕێگایە بە پتەوی درێژە بە كار و خەباتی خۆیان دەدەن، ڕۆژێكە كە ئێمە سەری ڕێز دانەوێنین بۆ ئەو شەهیدانە و بۆ گیانی پاكیان و بۆ بنەماڵەی ئازیزیان و دڵنیایان بكەینەوە كە ڕێگەی ڕۆڵەكانی ئەوان درێژەی هەیە. بەهەڵكەوت نییە كە لەوەها ڕۆژێكدا پەلێكی نوێ لە كچان و كوڕانی خەباتكاری كوردستان چەكی پڕ لە شانازیی كۆمەڵە هەڵدەگرن و دەیكەنە شانیان و ڕەوانەی مەیدانەكانی چالاكی دەبن. ئەو ڕێبازەی كە سەرەتا لە ساڵی ۱۳٤٨ی هەتاوی لەلایەن كاك فۆئاد و كاك حەمە حسێن و یارانیانەوە دامەزرا، دواتر بەخوێنی گەشی هەزاران شەهیدی كۆمەڵە ئاودرا. ئەم ڕێبازە زیندووە، ئەوەی كە جێگەی پێ لەق بووە، ئەوەی كە بێ داهاتوو، بێ ئاسۆ ماوەتەوە، ڕژیمی كۆنەپەرەستی كۆماری ئیسلامیی ئێرانە. جارێكی دیكە لە لایەن هەموو پێشمەرگەكانی كۆمەڵەوە، لە لایەن هەموو پێشمەرگە دێرینەكانەوە، لە لایەن هەموو پێشمەرگەكانی نەسڵی نوێی خەباتكارەوە سەری ڕێز دادەنەوێنم بۆ بنەماڵەی شەهیدان و بەڵێنیان لەگەڵ تازە دەكەمەوە  و دڵنیایان دەكەمەوە كە ئەو ڕێگەیە گەرموگوڕتر لە هەمیشە درێژەی هەیە. دوور نیە ئەو ڕۆژەی كە بەهیمەتی میلیۆنها كۆمەڵانی خەڵك لە ئێران و بە تایبەتی لە كوردستانی شۆڕشگێڕ، تۆماری ڕژیمی كۆماری ئیسلامی هڵپێچرێ و ئێمەش وەكوو میلەتانی ئازاد و سەربەستی دونیا ژیانێكی شیاوی ئینسان هەڵبژێرین.
تا ئەو ڕۆژە نابێ لەبیرمان بچێتەوە كە ئازادی بێ بەها نیە، بێ نرخیش نیە و تا ئەو ڕۆژە ئێمە دەبێ ئامادەی گیان فیدایی بین؛ بەوپەڕی دیسیپلینەوە، بەوپەڕی فەرهەنگی شۆڕشگێڕانەوە، بەوپەڕی لەخۆبردوویی و هاوپشتی و هاوخەمی بۆ یەكتریەوە، بەوپەڕی خزمەت بە خەڵكەوە، ئەم ڕێگەیە درێژە بدەین. پیرۆزبایی دەكەم لەو پێشمەرگانەی كە تازە دێنە ڕیزی پڕ لە شانازیی پێشمەرگەی كۆمەڵەوە و جارێكی دیكە سەرەخۆشی خۆم ئاراستەی هەموو بنەماڵەی شەهیدانی كۆمەڵە و بزووتنەوەی ڕزگاریبەخشی گەلی كورد دەكەم.


ئه‌م بابه‌ته 1803 جار خوێنراوه‌ته‌وه‌‌

PM:05:37:09/04/2018


زۆرترین خوێندراو