بۆ مەحکووم کردنی کردەوە تیرۆریستییەکانی ئەم دواییانەی کۆماری ئیسلامی، خۆپێشاندانێک لە فەنلاند بەڕێوەچوو

لەسەر داوا و بانگەوازی ناوەندی هاوكاری حیزبەكانی كوردستانی ئێران، خۆپیشاندان و ڕێپێوانێک دژ بە ئیعدامی چالاكانی سیاسی كورد و تیرۆریزمی كۆماری ئیسلامی ئێران دژ بە خەڵكی كورد لە فینلاند ڕێكخرا.
ئەمرۆ دوشەممە ١٠ .٩ .٢٠١٨ كۆمەلێكی زۆر لە ئازادیخوازان، تێكۆشەران و كوردستانیانی دانیشتووی وڵاتی فینلاند لە شاری هیلسینكی، بۆ مەحكووم كردنی  ئعدامی تێكۆشەرانی سیاسی كوردستانی ڕۆژهەڵات هاورێ ڕامین حسین پەناهی، زانیار و لۆقمان مۆرادی هەروەها  دژ بە هێرشی مووشەكی و بۆمبارانی بنكەكانی حیزبەكانی کوردستانی ڕۆژهەڵات لە کوردستانی باشوور، كە ژمارەیەكی زۆر لە ڕۆڵەكانی كورد شەهید و بریندار بوون و  تیرۆریزمی كۆماری ئیسلامی دژ بە گەلی كورد، كۆبوونەوەیەكی بەرینیان ڕێكخست.
 كۆبوونەوەكە لە ویستگەی مێترۆی كوڵوساری دەستی پیكرد بە رێپیوانی هێمنانە و بە دروشمگەلی جۆراوجۆر دژ بە سیاسەتی قەتل و عامی  ڕژیمی كۆنەپەرەستی كۆماری ئیسلامی لە كوردستان، تا بەر دەركی سەفارەتی رژیم. لەویدا میتینگەكە بە سروودی نەتەوایەتی ئەیرەقیب و دەقەیەك بیدەنگی بۆ رێزگرتن لە گیانی پاكی شەهیدان دەستی پیكرد. پاشان سەرەتا بەیاننامەی رێپێوانەكە بە زمانی كوردی، فارسی و فینلاندی خوێندرایەوە و لە ئیدامەدا پەیامی لایەنە سیاسییەكانی بەشداربوو لەو چالاكییە هاوبەشەدا پێشكەش بە جەماوەری بەشدار بوو كرا. خۆپیشاندانەكە تا كاتژمێر سێ دووانیوەرۆ  بە دروشمی دژ بە سیاسەتی داپڵۆسان و كوشت و بری ڕژیم لە كوردستان درێژەی كێشا.

كۆمەڵەی شۆڕشگێڕی زەحمەتكێشانی كوردستانی ئێران
کۆمیتەی فینلاند


ئه‌م بابه‌ته 380 جار خوێنراوه‌ته‌وه‌‌

PM:06:28:11/09/2018