بانگەوازی کۆمەڵەی شۆڕشگێڕی زەحمەتکێشانی کوردستانی ئێران

کۆمەڵانی خەڵکی ئازادیخواز!
حزب و رێکخراوه سیاسی و مەدەنییەکان!
کۆڕ و کۆمەڵه ئازادیخواز و مرۆڤدۆستەکان!
کەسایەتی و تێکۆشەرانی سیاسی و مەدەنی!
نووسەران، شاعیران، رۆژنامەنووسان و هونەرمەندانی ئازادیخواز!
بەم جۆره به ئاگاداریتان دەگەیەنین به پێی ئەو هەواڵانەی بە دەستمان گەیشتوون هاوڕێ رامین حسێن پەناهی بۆ قەرەنتینەی زیندانی سنه گوازراوەتەوه. به پێی ئەزموونی پێشوو بەداخەوه ئەمه نیشانەی ئەوەیه که کات و ساتی ئێعدامی رامین نزیکه. ئەوەش زانراوه که لێژنەیەک له تارانەوه چوونه زیندانی سنه (لێژنەی مەرگ). بەڵام زۆر بەداخەوه هەر دوای بڵاوبوونەوەی هەواڵی گواستنەوەی رامین بۆ قەرەنتینەی زیندان، نیشتمان حسێن پەناهی تەمەن ٢٥ ساڵ که دەبێتە خوشکەزای رامین و ئەفشین حسێن پەناهی، له ژێر گوشاری زۆری دەروونی و خەمی رامین و بنەماڵەکەیدا دەستی داوەته خۆکوژی و کۆتایی به ژیانی خۆی هێناوه. شایانی باسه مێردی نیشتمان خانمیش هەر له پێوەند لەگەڵ پەروەندەی رامین زیندانی کراوه.
هەر وەک ئاگادارن رۆژی پێنجشەممه رێکەوتی ٢٥ی ژانویە بەرامبەر به ٥ی رێبەندانی ١٣٩٦ی هەتاوی حوکمی ئێعدامی لاوی تێکۆشەری سیاسی رامین حسێن پەناهی له لایەن بێدادگای شۆڕشی سنەوه به وەکیلەکەی راگەیەندرا. شایانی باسه رامین حسێن پەناهی رێکەوتی ٢ی پووشپەڕی ١٣٩٦ به دوای ئەوەدا کە بۆ سەردانی دایک و باوکی پیر و بەساڵاچووی گەڕابۆوه کوردستانی رۆژهەڵات، له شاری سنه کەوتە ناو کەمینی هێزەکانی سپای پاسداران و به برینداری به دیل گیرا. لەو کاتەوه تا ئێستا له زینداندا ئەشکەنجه و ئازاری زۆر دراوه. دەرکردنی حوکمی ناعادڵانەی ئێعدام لە لایەن بێدادگای رژیمەوه بۆ ڕامین حسێن پەناهی به تاوانی ئەندامەتی کۆمەڵه بووه و چەند تۆمەتی دیکەشیان داوەته پاڵی بەڵام هاوڕێ رامین له کاتی دادگاییدا هەموو ئەو تۆمەتانەی رەت کردووەتەوه.
پێشێلکارییەکانی مافی مرۆڤ له لایەن رژیمی ئیسلامییەوه له ماوەی دەسەڵاتی خۆیدا له ئێران و به تایبەت له کوردستان له هیچ کەس شاراوه نییه. بەڵام ئەزموون نیشانی داوه ناڕەزایەتی بەرین له ئاستی جیهانیدا به حوکمی ئێعدامی چالاکێکی مەدەنی یا سیاسی، کاریگەریی ئەرێنی بووه و حوکمەکەی گۆڕیوه.
پرسی رامین کەیسێکی مافی مرۆڤی و ئینسانییه، ئێمه داوا له کۆمەڵانی خەڵکی ئازادیخواز، حزب و رێکخراوه سیاسی و مرۆڤدۆستەکان، کۆڕوکۆمەڵەکانی پارێزەری مافی مرۆڤ و کەسایەتییەکان و چالاکانی مەدەنی و نووسەران و شاعیران و رۆژنامەوانان و هونەرمەندانی ئازادیخواز دەکەین بەلەبەرچاو گرتنی ئەوەیکه بەداخەوه کاتمان زۆر کەم بە دەستەوه ماوه، بە هەوڵ و هیممەتی هەموو لایەک بەر به ئێعدامی رامین بگرین و نەهێڵێن رژیمی ئیسلامی ئێران بۆ نیشان دانی چنگ و ددانی خۆی به خەڵکی تووڕه و ناڕازی، گیانی رامین و لاوانی کوردستانمان بستێنێ.
ئێمه به بۆنەی کارەساتی دڵتەزێنی لەدەستچوونی نیشتمان خانم، هەر لێرەوه سەرەخۆشی گەرمی خۆمان ئاراستەی پەروانه خانمی دایکی نیشتمان و هەموو بنەماڵەی حسێن پەناهی دەکەین و هاوخەمیی قوڵی خۆمان دەردەبڕین.  
 
کۆمەڵەی شۆڕشگێڕی زەحمەتکێشانی کوردستانی ئێران
کومیتەی دەرەوەی وڵات
١ی مەی ٢٠١٨
                            ١١ی گوڵانی ١٣٩٧‌                             

ئه‌م بابه‌ته 151 جار خوێنراوه‌ته‌وه‌‌

PM:11:35:01/05/2018