ڕێگە مەدەن ڕێژیمی ئێران گیانی بەندییەكی سیاسیی دیكە بستێنێ!

بانگەوازای ناوەندی هاوكاریی حیزبەكانی كوردستانی ئێران:
ڕێگە مەدەن ڕێژیمی ئێران گیانی بەندییەكی سیاسیی دیكە بستێنێ!

حەوتووی رابردوو، "دیوانی بەرزی وڵات" حوكمی زاڵمانە و ناڕەوای ئێعدام لە بارەی بەندی سیاسیی كورد رامین حوسێن پەناهیی پەسەند كردەوە.
حوكمی ئێعدامی رامین حوسین پەناهی یەكەم جار ڕۆژی پێنجشەممە ٢٥ ژانویەی ٢٠١٨ی زایینی، لە لایەن بە ناو "دادگای شۆرش" لە شاری سنه، بە سەر ئەو بەندییە سیاسییە كوردەدا سەپێندرا. ئەوحوكمە لە كاتێك‌دا بە سەر ڕامین‌دا سەپێندرا كە ناوبراو تەواوی قۆناغەكانی لێكۆڵینەوە و پێكهاتنی پەروەندەكەی بە برینداری و لە ژیر ئازار و ئەشكەنجەدا تێپەڕ كردبوو. ئەو بەناو دادگایەش كە بۆ موحاكەمە كردنی ئەو پێك هاتبوو، تەنیا یەك جار كۆ بۆوە! هەر ئەو كات دەركردنی حوكمی زاڵمانەی ئێعدام بۆ رامین حوسێن پەناهی بووە هۆی سەرسوڕمانی وەكیلەكەی، حوسێن ئەحمەدی نیازو سەرجەم ناوەندەكان و چالاكانی بەرگری لە دادپەروەری و مافی مرۆڤ لە كوردستان و ئێران‌دا.
پەسندكرانەوەی حوكمی ئێعدامی ئەو بەندییە سیاسییە كوردە لە لایەن "دیوانی بەرزی وڵات" نیشاندەری ئەو راستییەیە كە ڕێژیمی كۆماری ئیسلامیی ئێران بە دوای پەرەگرتنی ناڕەزایەتییە سەرانسەرییەكان لە ئێران و بە تایبەتی بەڕێوەچوونی خۆپێشاندانەكان، بۆ چاوترساندنی خەڵكی وەزاڵەهاتوو، هەر وا كە لە كوشتنی خۆپێشاندەرەكان لە ژێر ئەشكەنجە دا دەستی نەپاراستوە، دەیەوێ لە ئیعدامی بەندییە سیاسییەكانیش دەست نەپارێزێ.
ئێمە لە هەموو ناوەند و كۆڕ و كۆمەڵە مرۆڤدۆستەكانی جیهان داواكارین بە دەنگ هاواری بنەماڵەی رامین حوسێن پەناهی و بانگەوازی چالاكانی مافی مرۆڤ و هێزە سیاسییەكانی ڕۆژهەڵاتی كوردستانەوە بێن. داوای بەپەلەیان لێ دەكەین بە مەحكووم كردنی پەسندكردنەوەی حوكمی ئێعدامی ڕامین حوسێن پەناهی و گوشارهێنان بۆ سەر ڕێژیمی ئێران لەو پیوەندییەدا، پێش بە مەترسیی ئێعدامی ئەو لاوە كوردە تێكۆشەرە بگرن. هەر لەو كاتەدا داوا و چاوەڕوانیمان ئەوەیە سەرنج و بایەخێكی تایبەتی بە چارەنووسی ئەو گیراوانە بدەن كە بە دوای خۆپێشاندان و ناڕەزایەتییەكانی چەند مانگی رابردوولە لایەن دەزگا سەركوتكەرەكانی كۆماری ئیسلامیی ئێران لە كوردستان، خوزستان، تاران و شار و ناوچەكانی دیكەی ئێران گیراون و لە گەڵ مەترسیی مردن لە ژێر ئەشكەنجە و چارەنووسێكی نادیار بەرەوڕوون.
هەر لەم دەرفەتەش كەلك وەردەگرین بۆ راگەیاندنی سپاس و پێزانینی خۆمان هەمبەر هەموو ڕێكخراوە مەدەنییەكان، پارێزەرە بوێرەكان ، چالاكانی بەرگری لە مافی مرۆڤ و میدیاكارانی ئازادیخوازلە نیوخۆ و دەرەوەی وڵات كە لە پێوەندی لە گەڵ چارەنووسی رامین حوسێن پەناهی و گیراوانی سیاسی و مەدەنیی دیكە لە بەندیخانەكانی كۆماری ئیسلامی‌دا، بێ ماندووبوون چالاكی دەكەن.

ناوەندی هاوكاریی حیزبەكانی كوردستانی ئێران
(پێكهاتوو لە:
كۆمەڵەی شۆڕشگێڕی زەحمەتكێشانی كوردستانی ئێران
كۆمەڵەی زەحمەتكێشانی كوردستان
سازمانی خەباتی كوردستانی ئێران
حیزبی دیموكراتی كوردستانی ئێران
حیزبی دیموكراتی كوردستان)

٢٤ی خاكەلێوەی ١٣٩٧
١٣/٤/٢٠١٨

ئه‌م بابه‌ته 273 جار خوێنراوه‌ته‌وه‌‌

PM:11:40:13/04/2018