كردەوە تێرۆریستییەكانی كۆماری ئیسلامی دژ بە هێزەكانی ڕۆژهەڵاتی كوردستان مەحكووم دەكەین

بەیاننامەی ناوەندی هاوكاریی حیزبەكانی كوردستانی ئێران:

كردەوە تێرۆریستییەكانی كۆماری ئیسلامی دژ بە هێزەكانی ڕۆژهەڵاتی كوردستان مەحكووم دەكەین

وەك لە ڕاگەیەندراوی خەبەریی سكرتاریای حیزبی دیموكراتی كوردستاندا هاتووە، شەوی سێشەمە لە سەر چوارشەمە 6 لەسەر 7ی مارسی 2018، (15 لە سەر 16ی ڕەشەمەی 1396) قادر قادری، كادری حیزبی دێموكراتی كوردستان لە كردەوەیەكی تێرۆریستیدا شەهید بووە و تەرمەكەی لە دەوروبەری ماشێنەكەی لە نزیك گوندی "هەرتەلێ"‌ لە كاتێكدا ئاسەواری زیاتر لە بیست فیشەكی پێوە بووە، دۆزراوەتەوە.
هەر چەند ڕۆژ پێش بوو لە نێو شاری هەولێر دوو ئەندامی حیزبی دێموكراتی كوردستانی ئێران بوونە قوربانیی كردەوەیەكی تێرۆریستی كە یەك لەوان بەناوی سەباح ڕەحمانی دوای هەلگرتنی برینی قورس بە داخەوە شەهید بوو.
پێشتریش لەلایەن كۆماری ئیسلامییەوە چەند هەوڵی دیكەی تێرۆریستی دژ بە هێزە سیاسییەكانی ڕۆژهەڵاتی كوردستان دراون كە بەشێكیان وەك هەوڵە تێرۆریستییەكان بۆ سەر كۆمەڵەی زەحمەتكێشانی كوردستان و كۆمەڵەی شۆڕشگێری زەحمەتكێشانی كوردستانی ئێران پووچەڵ كرانەوە و تەقینەوەكەی شەوی یەلدا لە بنكەی دەفتەری سیاسیی حیزبی دیموكراتی كوردستان كە بەداخەوە شەهید بوونی حەوت تێكۆشەری كوردی لێ كەوتەوە.
ئێمە وەك حیزبەكانی ڕۆژهەڵاتی كوردستان كۆماری ئیسلامی لە پشت هەموو ئەو تاوان و كردەوە تێرۆریستییە دەبینین، چونكی جیا لە ڕێژیمی كۆماری ئیسلامی هیچ لایەنێكی دی بە نەیار و دوژمنی خۆمان دانانێین. بە تایبەت كە دەزگای تێرۆری كۆماری ئیسلامی پێشینە و ڕابردوویەكی پڕدیاری لە تێرۆری كادر و پێشمەرگە و ئەندامانی حیزبە كوردییەكانی ئۆپۆزیسیۆنی ڕێژیمدا هەیە، هەر لە تێرۆرەكانی دەیەی 90ی زایینی دژ بە هێزە سیاسییەكانی ڕۆژهەڵاتی كوردستان كە سەدان تێكۆشەری كوردیان لێ ستاندین، هەم لە تێرۆری كەسایەتییە سیاسییەكانی دژبەری كۆماری ئیسلامی لە دەرەوەی وڵات، بە تایبەت تێكۆشەرانی كورد كە دواتر لە پەروەندەی تێرۆری مێكونووسدا دەزگای قەزایی ئاڵمان لە بڕیارە مێژووییەكەی خۆیدا ڕایگەیاند كە كۆماری ئیسلامیی ئێران و كاربەدەستانی هەرە سەرووی ئەو ڕێژیمە لە پشتی ئەو تێرۆر و تاوان و جیناتانە‌ن كە ڕێژیم لە دەرەوەی وڵات كردوونی.
ئێمە حیزبە سیاسییەكانی كوردستانی ئێران چ بە تاك و چ بە كۆ (كۆبوونەوەی هاوبەشی
حیزبە كوردستانییەكانی هەر چوار بەشی كوردستان بۆ مەحكوومكردنی كردەوەی تیرۆریستیی شەوی یەلدا) پێشتر و هەر ئەو كات ڕامانگەیاند كە نیگەرانین لەوەی تاوانی تیرۆریستیی شەوی ١ی بەفرانبار‌ و پیلانە پووچەڵبۆوەكانی پێشتر، سەرەتایەك بێ بۆ ئەوەی جارێكی دیكە هەرێمی كوردستان ببێتەوە بە مەیدانی  پیلان و هەڕەشە و كردەوەی تیرۆریستیی لە دژی لایەنە سیاسییە خەباتكارەكانی ڕۆژهەڵاتی كوردستان و، ئێستا بە داخەوە دەردەكەوێ كە نیگەرانییەكانمان لە جێی خۆیدا بووە.
ئێمە جارێكی دیكەش وێڕای مەحكوومكردنەوەی كردەوە تێرۆریستییەكانی كۆماری ئیسلامی لە دژی تێكۆشەرانی ڕۆژهەڵاتی كوردستان كە نوێترینیان تێرۆری سەباح ڕەحمانی و قادر قادرییە؛ بە ئەركی حكوومەتی هەرێم و سەرجەم دەزگا پێوەندیدارەكانیشی دەزانین ڕێگر بن لە جێبەجێبوونی هەرەشە و پیلانە تێرۆریستییەكان لە دژی لایەنە سیاسییەكانی ڕۆژهەڵاتی كوردستان كە لە هەرێمی كوردستان، گیرساونەوە. هەروەها بە ئیمان بە ڕەوابوونی خەباتی كورد لە ئێران بۆ دەستەبەری مافە مەدەنی و نەتەوایەتییەكانی، پێ لەسەر ئەوە دادەگرینەوە كە تێرۆر و هەڕەشە و تۆقاندن و سەركوت هەنگاومان پێ شل ناكەن و لە خەبات و تێكۆشان ساردمان ناكەنەوە.

ناوەندی هاوكاریی حیزبەكانی كوردستانی ئێران
7/3/2018
16/12/1396

ئه‌م بابه‌ته 414 جار خوێنراوه‌ته‌وه‌‌

PM:04:57:07/03/2018