بە بەشداری نوێنەری کۆمەڵەی شۆڕشگێڕ"هەدەپە" سێهەمین کۆنگرەی خۆی بەست

سەر لە بەیانی ئەمڕۆ یەكشەممە ١١ی فێبرییەی ٢٠١٨ (٢٢ی ڕێبەندانی ٩٦) پارتی دێمۆكراتی گەلان (هەدەپە) سێهەمین كۆنگرەی خۆی لە هۆڵی وەرزشی ئانكارا بە بەشداری هەزاران كەس بەست.

ئەم كۆنگرەیە لە ژێر دروشمی "ئاشتی و ئازادی" بە بەشداری هەزاران كەس لە ئەندامانی هەدەپە لە لە شارەكانی توركیا و كوردستانی باكوورەوە بەڕێوە دەچێت. بە لە بەر چاوگرتنی ئەوەی "سەلاح دەمیرتاش" هاوسەرۆك و بەشێكی پەرلەمانتاران و ئەندامان و لایەنگرانی ئەو حیزبە لەلایەن دەسەڵاتی توركیاوە دەستگیركراون، ئامانجی سەرەكی ئەم كۆنگرەیە نۆژەنكردنەوەی سەرۆكایەتی ئەو حیزبە دەبێت  و بڕیارە سێ ڕۆژ بخایەنێت.  

لە كوردستانی ڕۆژهەڵاتەوە تەنیا حیزبی كۆمەڵەی شۆڕشگێڕی زەحمەتكێشانی كوردستانی ئێران ئامادەی ئەو كۆنگرەیە بوو. هاوڕێ "زاگرۆس خسرەوی" نوێنەری كۆمەڵە لەو كۆنگرەیەدا بەشداری كرد. لە كوردستانی باشووریش یەكێتی نیشتمانی كوردستان، حیزبی سۆسیال دێمۆكراتی كوردستان، حیزبی یەكگرتووی ئیسلامی و حیزبی زەحمەتكێشان ئامادە بوون. لە ڕۆژی كرانەوەی كۆنگرەی سێی هەدەپە پەیامی بەڕێزان مەسعوود بارزانی و كۆسرەت ڕەسووڵ عەلی خوێندرانەوە.

لە هەڵبژرادنەكانی ئەو پارتە "پەروین بوڵدان" پەرلەمانتاری هەدەپە و "سەزایی تەمەللی" جێگری هاوسەرۆكی هەدەپەی بۆ پۆستی هاوسەرۆكانی نوێی ئەو پارتە دیاری كران. ئەوەش پاش ئەوە دێت كە سەلاح دەمیرتاش هاوسەرۆكی هەدەپە لە زیندانەوە ڕایگەیاند، خۆی بۆ پۆستی هاوسەرۆكی هەدەپە كاندید ناكاتەوە. جێی ئاماژەیە "عوسمان بایدەمیریش وەك ئەندامی سەرۆكایەتی ئەو حیزبە هەڵبژێردرا.

لە ڕۆژی كرانەوەی كۆنگرەدا هەروەها باس لە گوشارەكانی دەوڵەتی توركیا كرا لە سەر بەڕێوەچوونی ئەو كۆنگرەیە.

 پارتی دێمۆكراتیكی گەلان (هەدەپە) ڕۆژی ١٥ی نومبر (سەرماوزی) ساڵی ٢٠١٢ لە ئانكارا پایتەختی توركیا دامەزرا.

جێی ئاماژەیە، نوێنەری زۆرێك لە حیزب و پارتە چەپ و سۆسیالیستەكانی جیهان لەو كۆنگرەیەدا بەشدار بوون و هاوڕێ "زاگرۆس خسرەوی" بە نوێنەرایەتی كۆمەڵە لەگەڵ كۆمەڵێك لە نوێنەری ئەو حیزبانە دیدار و چاوپێكەوتنی ئەنجام دا.

ئه‌م بابه‌ته 456 جار خوێنراوه‌ته‌وه‌‌

PM:09:14:11/02/2018